新來港兒童入學及支援

剛到香港定居、未有學位嘅兒童，教育局設有學位安排同適應支援。呢頁整理官方資料；如果你係人才計劃受養人，請同時睇專才家庭幼升小。

點樣搵學位

教育局「新來港兒童入學安排」頁面列出三個途徑：

1. 直接聯絡學校遞交入學申請，學校按校本情況（例如有冇空缺）考慮。
2. 聯絡教育局區域教育服務處（港島、九龍、新界東、新界西，按居住地區），職員會協助安排入學。
3. 喺主要出入境管制站、區域教育服務處或民政諮詢中心索取單張，填妥表格（EDB115）交回教育局，學位安排及支援組會喺收到後三個工作天內聯絡家長。

查詢電話：2892 6191（辦公時間內）。如果趕得上小一統籌辦法嘅申請期，睇制度總覽；已過申請期可以直接問學位分配組（2832 7700）。

適應支援

• 全日制「啟動課程」：入讀主流學校前修讀，為期六個月，由學校開辦，每班約20人，包括中英文、學習技巧、社會適應等；完成後教育局協助入讀主流學校。服務對象包括內地新來港兒童、新來港非華語兒童及回流兒童。開辦學校每年不同，請睇教育局名單。
• 「適應課程」：教育局資助非政府機構開辦，共60小時，可以一邊入讀主流學校、一邊課餘修讀，免費。資格：6至18歲、來港定居或在本地學校接受教育不足一年嘅兒童。
• 取錄新來港兒童嘅公營學校同直資學校，可以申請「校本支援計劃津貼」，用嚟開課餘補習班或迎新活動。
• 有特殊教育需要嘅學童會被轉介至教育局特殊教育支援組。

資料只供參考，以教育局及學校公布為準。